අපි හිතාගෙන ඉන්නේ අපි හරිම දියුණුයි කියලා. අපි අහස උසට ගොඩනැගිලි හැදුවා, සඳට ගියා, ඉන්ටර්නෙට් හැදුවා. නමුත් පිටසක්වල ජීවියෙක් ඈත විශ්වයේ සිට අපි දෙස බැලුවොත්, ඔවුන්ට අපි පෙනෙන්නේ “ගල් යුගයේ මිනිසුන්” ලෙස විය හැක.

ඇයි? 1964 දී රුසියානු තාරකා විද්‍යාඥ නිකොලායි කාර්ඩෂෙව් (Nikolai Kardashev) අපූරු මිනුම් දණ්ඩක් ඉදිරිපත් කළේය. ශිෂ්ඨාචාරයක දියුණුව මනින්නේ ඔවුන් සතුව ඇති මුදල් හෝ තාක්ෂණය මත නොවේ; ඔවුන්ට පාලනය කළ හැකි “ශක්ති ප්‍රමාණය” (Energy Consumption) මතය.

මෙන්න ඒ විශ්වීය Report Card එක:

Type 0: අපි තාම බිංදුවේ (Type 0 Civilization)

කණගාටුදායක ඇත්ත මෙයයි. කාර්ඩෂෙව් පරිමාණයට අනුව මිනිසා තාම “පළමු පන්තියට” (Type I) වත් සමත් වී නැත. අපි ඉන්නේ Type 0.73 වැනි තැනකය.

• අපි තාම ශක්තිය නිපදවා ගන්නේ මැරුණු ගස් සහ සතුන් (ෆොසිල ඉන්ධන/ඛනිජ තෙල්) පුළුස්සා දැමීමෙනි.
• අපිට තාම අපේ පෘථිවියේ කාලගුණය පාලනය කළ නොහැක. සුළි කුණාටුවක් ආ විට අපි කරන්නේ හැංගෙන එක පමණි.
• අපි තාම අපේම ග්‍රහලෝකයේ සිරකරුවන්ය.

අපිට Type I වීමට නම් තව වසර 100-200ක් පමණ ගත විය හැක. (අපි ඊට කලින් න්‍යෂ්ටික යුද්ධයකින් විනාශ නොවුණොත්).

Type I: ග්‍රහලෝකයේ අධිපතියන් (Planetary Civilization)

මෙයයි අපේ පළමු ඉලක්කය. Type I ශිෂ්ඨාචාරයකට පුළුවන්, තමන්ගේ ග්‍රහලෝකයට ලැබෙන සියලුම සූර්ය ශක්තිය (All Solar Energy reaching the planet) භාවිතා කරන්න.

• ඔවුන්ට ඉන්ධන හෝ ගල් අඟුරු අවශ්‍ය නැත. සුළං, රළ සහ සූර්ය බලය 100%ක් භාවිතා කරයි.
• සුපිරි බලයන්: ඔවුන්ට භූමිකම්පා නැවැත්විය හැක. සුළි කුණාටු පාලනය කළ හැක. සාගර මත නගර ඉදි කළ හැක.
• පෘථිවිය යනු ඔවුන්ගේ ගෙදර මිස, සිරගෙදර නොවේ.

Type II: තරු අයිතිකරුවන් (Stellar Civilization) – The Star Trek Level

මොවුන්ට තමන්ගේ ග්‍රහලෝකයේ ශක්තිය මදි වේ. ඒ නිසා ඔවුන් කෙලින්ම යන්නේ තමන්ගේ සූර්යයා (Star) ළඟටයි. මෙහිදී එන වැදගත්ම සංකල්පය වන්නේ “Dyson Sphere” (ඩයිසන් ගෝලය) යි.

• සූර්යයා වටා විශාල කවචයක් හෝ පැනල් ජාලයක් ඉදිකර, සූර්යයාගෙන් පිටවන සම්පූර්ණ ශක්තියම උරා ගැනීම. (අද අපි සූර්යයාගෙන් ගන්නේ 0.00000001% ක් වැනි අංශු මාත්‍රයකි).
• සුපිරි බලයන්: මොවුන්ට ග්‍රහලෝකයක් විනාශ වුණාට ප්‍රශ්නයක් නැත. ඔවුන්ට වෙනත් ග්‍රහලෝකයක් “Terraform” කර එහි පදිංචි විය හැක. ඔවුන් ස්වභාවික විපත්වලින් විනාශ කළ නොහැකි ජාතියකි (Immune to Extinction).

Type III: දෙවිවරුන් (Galactic Civilization) – The Star Wars Level

මොවුන් සිතාගත නොහැකි තරම් දියුණුයි. ඔවුන් පාලනය කරන්නේ එක තරුවක් නොවේ; මුළු මන්දාකිනියේම (Galaxy) ඇති තරු බිලියන ගණනක බලයයි.

• මොවුන්ට ආලෝකයේ වේගය අභිබවා යා හැකි තාක්ෂණය (Warp Drives / Wormholes) තිබිය හැක.
• ඔවුන් මුළු මන්දාකිනියම යටත් කරගෙන (Colonize), රොබෝවරුන් මගින් තරු පාලනය කරයි.
• අප වැනි Type 0 ජීවීන්ට මොවුන්ව පෙනෙන්නේ “දෙවිවරුන්” ලෙසයි. ඔවුන් කරන දේවල් අපට “මැජික්” වැනිය.

Type IV & V: විශ්වයෙන් එහාට (Omega Civilization)

කාර්ඩෂෙව් මුලින් කීවේ මට්ටම් 3ක් ගැන පමණයි. නමුත් නූතන විද්‍යාඥයින් තවත් ඉදිරියට සිතයි.

• Type IV: මුළු විශ්වයේම (Universe) ශක්තිය පාලනය කරන අය.
• Type V: බහු-විශ්වයන් (Multiverse) අතර ගමන් කළ හැකි අය. ඔවුන්ට භෞතික විද්‍යාවේ නීති වෙනස් කළ හැක. ඔවුන්ට විශ්වයක් නිර්මාණය කිරීමට පවා හැක.

නිගමනය: The Final Human Update

අපි දැන් ඉන්නේ මංසන්ධියකයි. එක්කෝ අපි Type I බවට පත්වී තරු අතරට යා යුතුය. නැතහොත් අපි අපේම කුණු ගොඩවල් සහ යුද්ධ නිසා Type 0 මට්ටමේදීම වඳ වී යා යුතුය.

අපේ “Final Human Update” එක වන්නේ හුදෙක් ස්මාර්ට් ෆෝන් එක අලුත් කිරීම නොව, මුළු ග්‍රහලෝකයම එකම ඒකකයක් ලෙස ක්‍රියා කරන තැනට (Planetary Consciousness) දියුණු වීමයි.