චීනයේ ග්වැංඩොං (Guangdong) ප්‍රදේශයේ ෂුන්ඩේ (Shunde) නගරයේ පිහිටි Midea Smart Manufacturing Complex නැමැති ඩොලර් බිලියන 1.2 ක දැවැන්ත කර්මාන්තශාලා සංකීර්ණය පිටතින් බලන විට සම්පූර්ණයෙන්ම පාළු ස්ථානයක් මෙන් දිස්වේ. නමුත් එහි ඇතුළත, අඳුරේම දහස් ගණනක් වූ රොබෝ අත් මඟින් ඉතා ඉහළ නිරවද්‍යතාවයකින් යුතුව කොටස් සෑස්සීම, පෑස්සීම (Welding) සහ එකලස් කිරීම සිදු කරයි.

මෙහි කිසිදු ආලෝක පද්ධතියක්, වායු සමීකරණ පද්ධතියක් හෝ සේවකයින් සඳහා වන තේ විවේකයක් නොමැත. යන්ත්‍රවලට වැඩ කිරීමට ආලෝකය අවශ්‍ය නොවන අතර, මිනිස් සේවකයින්ගේ සහභාගීත්වයකින් තොරව පැය 24 පුරාම නොනවත්වා ක්‍රියාත්මක වන මෙම සංකල්පය “Dark Factory” (අඳුරු කර්මාන්තශාලා) හෝ “Lights-Out Manufacturing” ලෙස හඳුන්වයි.

ආර්ථික වෙනස්වීම්: මිනිස් ශ්‍රමය වෙනුවට රොබෝවරුන් යෙදවූයේ ඇයි?

දශක හතරක් පුරා ලෝකයේ නිෂ්පාදන කේන්ද්‍රස්ථානය බවට පත්ව සිටි චීනයේ ප්‍රධානම වාසිය වූයේ ලාභදායී මිනිස් ශ්‍රමයයි. කෙසේ වෙතත්, 2006 සහ 2021 අතර කාලය තුළ චීනයේ කර්මාන්තශාලා සේවකයින්ගේ වේතන 300% කින් පමණ ඉහළ ගියේය.

ජීවන තත්ත්වය උසස් වීමත් සමඟ, නව යොවුන් පරම්පරාව දැඩි මහන්සියක් සහිත කාර්මික රැකියාවලින් ඉවත් වී විශ්වවිද්‍යාල අධ්‍යාපනය සහ සේවා ක්ෂේත්‍රයේ රැකියා වෙත යොමු වූහ. එමඟින් චීනය “මැදපෙළ ආදායම් උගුලකට” (Middle-income trap) හසුවීමේ අවදානමක් මතු විය. එනම් වියට්නාමය, බංග්ලාදේශය වැනි ලාභදායී රටවල් සමඟ තරඟ කිරීමට නොහැකි වීමත්, ඉහළ තාක්ෂණික නිෂ්පාදන අංශයෙන් තවමත් පූර්ණ ලෙස ඉදිරියට නොපැමිණීමත්ය.

ඊට පිළියමක් ලෙස චීන රජය ක්‍රියාත්මක කළේ අපූර්ව්ය උපායමාර්ගයකි. එනම් නිෂ්පාදන අංශයෙන් ශ්‍රම පිරිවැය (Labor Cost) යන්න සම්පූර්ණයෙන්ම ඉවත් කර දැමීමයි.

“Made in China 2025” සහ රොබෝ තාක්ෂණික විප්ලවය

2015 මැයි 19 වන දින චීන රජය විසින් “Made in China 2025” නැමැති ජාතික ප්‍රතිපත්තිය එළිදක්වන ලදී:

• ඉලක්ක අභිබවා යාම: 2015 දී චීනයේ සේවකයින් 10,000 කට සිටියේ කාර්මික රොබෝවරුන් 36 කි. 2020 වන විට එය 150 දක්වා ඉහළ නැංවීමට සැලසුම් කළද, 2022 වන විට චීනය සේවකයින් 10,000 කට රොබෝවරුන් 246 ක් දක්වා තම ධාරිතාව වැඩි කරගත්තේය.
• ගෝලීය රොබෝ භාවිතය: 2022 වසරේදී පමණක් චීන කර්මාන්තශාලා තුළ රොබෝවරුන් 290,258 ක් අලුතින් ස්ථාපනය කරන ලදී. මෙය ලෝකයේ සසුරැ සියලු රටවල් එකතුවට වඩා වැඩි අගයකි.
• ජර්මානු තාක්ෂණය අත්පත් කරගැනීම: 2016 දී චීනයේ Midea සමාගම විසින් ජර්මනියේ ප්‍රමුඛතම රොබෝ තාක්ෂණික සමාගමක් වන Kuka සමාගම යුරෝ බිලියන 4.5 කට මිලදී ගත්තේය. එමඟින් ලොව ඉහළම ජර්මානු රොබෝ තාක්ෂණික දැනුම සහ සැලසුම් චීනය සතු විය.

Dark Factory එකක් ක්‍රියාත්මක වන්නේ කෙසේද?

Dongguan හි පිහිටි Changying Precision Technology සහ Shunde හි Midea කර්මාන්තශාලා ක්‍රියාත්මක වන්නේ නවතම ස්වයංක්‍රීය තාක්ෂණයන් පදනම් කරගෙනයි:

1. LiDAR සහ Radar සංවේදක: ස්වයංක්‍රීය ප්‍රවාහන රථ (AGVs) අඳුරේ ගමන් කරන්නේ LiDAR සහ මිලිමීටර්-රේඩාර් තාක්ෂණය මඟිනි. ඒ සඳහා ආලෝක සංඥා හෝ කැමරා අවශ්‍ය නොවේ.
2. මයික්‍රෝන මට්ටමේ නිවැරදිභාවය (Micron Precision): රොබෝ අත් මඟින් මිනිස් අතකට කළ නොහැකි මයික්‍රෝන මට්ටමේ නිවැරදිභාවයකින් යුතුව කොටස් එකලස් කරයි. නිෂ්පාදිත අයිතම 3D Optical Scanning මඟින් පරීක්ෂා කරනු ලබයි.
3. Decentralized Edge Computing: සෑම රොබෝ පද්ධතියකටම වෙනම ප්‍රොසෙසර පවතින බැවින්, මධ්‍යගත සර්වරයක දෝෂයක් ආවද සමස්ත කර්මාන්තශාලාවම අක්‍රිය නොවේ.

කාර්යක්ෂමතාවයේ දැවැන්ත වෙනස

මිනුම් දණ්ඩ	සාම්ප්‍රදායික මිනිස් ශ්‍රම සහිත කර්මාන්තශාලා	චීන Dark Factory (Changying / Midea)
දෝෂ සහිත අයිතම ප්‍රතිශතය (Defect Rate)	1.5% – 3.0% අතර	0.01% (අයිතම 10,000 කට 1 යි)
සේවකයින් සංඛ්‍යාව	සේවකයින් 8,000 ක් පමණ (උදා: VW Zwickau)	සේවකයින් 60 ක් පමණි (පාලන මැදිරියේ සිට නිරීක්ෂණයට)
ක්‍රියාකාරී වේලාවන්	වැඩ මුර 2–3 ක් (විවේක කාල සහිතව)	පැය 24 / දින 365 නොනවත්වා

සැබෑ තරඟය: “අනුමැතිය ලබාගැනීමේ වේගය”

ජර්මනිය, ජපානය හෝ ඇමරිකාවට වඩා වේගයෙන් චීනය මෙවැනි අඳුරු කර්මාන්තශාලා ඉදිකිරීමට ප්‍රධාන හේතුව තාක්ෂණය පමණක් නොවේ; ඒ සඳහා යන කාලය සහ නීතිමය ක්‍රියාවලියයි:

යුරෝපයේ මෙවැනි කර්මාන්තශාලාවක් ඉදිකිරීමට පාරිසරික අනුමැතීන්, වෘත්තීය සමිති සාකච්ඡා සහ කලාපීය නීතිමය අනුමැතීන් සඳහා වසර 5 සිට 10 දක්වා කාලයක් ගතවේ. නමුත් චීනයේ විශේෂිත Smart Zones තුළ ඉඩම් අනුමැතිය, රාජ්‍ය සහතිකකරණය සහ ඉදිකිරීම් එකවර සිදුවන බැවින් වසර 2 ත් 3 ත් අතර කාලයකදී සමස්ත කර්මාන්තශාලාවම නිෂ්පාදන කටයුතු ආරම්භ කරයි.

2030 අනාගතය

චීන කර්මාන්ත හා තොරතුරු තාක්ෂණ අමාත්‍යාංශය (MIIT) පුරෝකථනය කරන්නේ 2030 වන විට චීනයේ ප්‍රධාන Smart Zones තුළ පිහිටි බොහෝ කර්මාන්තශාලා “Dark Factory” තත්ත්වයට පත්වෙනු ඇති බවයි.

තවද, මීළඟ පරම්පරාවේ කර්මාන්තශාලා මඟින් ස්වයංක්‍රීයව නිෂ්පාදන දත්ත විශ්ලේෂණය කරමින්, මිනිස් ඉංජිනේරුවෙකුගේ සහායකින් තොරව තමන්ගේ නිෂ්පාදන ක්‍රියාවලිය ස්වයංක්‍රීයව යාවත්කාලීන කරගැනීමේ (Self-Improving) තාක්ෂණය වෙතද යොමු වෙමින් පවතී.

“Made in China” යන්න මින් ඉදිරියට ලාභදායී මිනිස් ශ්‍රමය නොව, නොනවත්වා ක්‍රියාත්මක වන අති-කාර්යක්ෂම අනාගත තාක්ෂණික පද්ධතියක් නිරූපණය කරනු ඇත.